[center]السلام عليكم ورحمة الله وبركاته ..
هذي بعض القصائد للشاعر الكبير سعد بن جدلان ..
اعجبتني وحبيت انقلها لكم وان شاء الله تحوز على اعجابكم ..
العام تكرم مداين من كرم عينك
وافرح ليا انقاد لك سلمٍ يوصلني
واليوم اواصلك اسدد في وفا دينك
ولا فلا عاد به شيءٍ يمكنّي
لا إنقص حبل الرجا من بيني وبينك
وش عاد ابي منك ولا وش تبي مني
***
شعاني حمامٍ فوق روس النوامي خلج
تغني على روس النعانيع منسجمه
آلا حيه من فرقاك يابو خدودٍ بلج
عسى لايم الميلاف عبرود ابو نجمه
محبتك حطت في محاني ضلوعي فلج
كما فلج سيل لواديٍ ضكّته عجمه
***
سبحان واليك ياليلٍ سرى برقه
ارآقبك والعرب في نومهم غرقا
ماصدت من شوفك الا الهم والحرقه
بعض الملاقى تعوضني بها الفرقا
حبٍ مع حب غيري ماظهر فرقه
غديت كني شفيع وحبه الزرقا
***
ياكبد ياللي لغالي الكيف ضميانه
كيفٍ هله للطراقي مايسوونه
فنجال بنٍ وخمس سنين زيانه
ياقو خرمة ضيوفٍ ايتحرونه
عز الله اني بذلت الجهد من شانه
سقت الركايب وراه وبركن دونه
***
ياصاحبي شوفتك عقب التشافيق
تحيي ضميرٍ دنى منه اليباسي
من لامني جعل تفجاه التفافيق
والكل منهم محققٍ ومتواسي
بقصيرات العدن روس الصناديق
عكف الاصابع رهيفات الكراسي
***
كبدي اللي من مشوخ الزمان مفلّقه
شرها تلقاه وعلاجها ماينلقا
والسبب قلبٍ تعلق بحب معلّقه
دونها باب الرجاوي قافلٍ ومغلقا
شبه وضحٍ ذاهنٍ وجهها ومذلقه
في طلبها ترخص النفس في يوم اللقا
***
لعنبو بعض الغنادير لو انه عجوز
اتعزز بس اذا شفتها رحت ثعوه
لامشت بالردف كنه من الجسم محيوز
كنها تسحب وراها كمامين قهوه
اترك اللي بطنها تقل حفاظة خبوز
والله انه سد نفس وتسكير شهوه
***
ياماشاءالله كان يالجوده والانتاج المحلّي
وشهو ذا الزين وش ذا الدل وش ذا الجاذبيه
ياوليفي لاتشهويني بشيٍ ماحصل لي
لاتوهقني تراني ميتٍ والناس حيّه
بالردوف اللي تقول انها على رمان بلّي
ذي تقول ازحف وراك وذي تقول اقرب شويّه
***
عز الله ان اخر هوى النفس الاقناع
مهما يزيد النصح والعذل واللوم
لاواهني بعض العرب يكبر بساع
ويزود علوم ويزداد بعلوم
وحنا كبرنا غير في بعض الاوضاع
والله ماكنّا كبرنا ولا يوم
***
وش بنا وش ذنبنا ربنا ماحبنا
الديار بخير من زارها ماذمّها
لا انعزل شمامتين من الطلع قرنا
ومرها الساقي وهب الهوى من يمها
اتعب انا كل ما اشوفها اتعب انا
واحترق واذوب واروح في عين امها
***
ياشبه عدوٍ ردومٍ تزيد النّي نيّ
في طرف ذودٍ بعارينها متفادره
القبل طفطوف وقرٍ محاصيله شوي
والملاقا شايعات الوارده للصادره
انت شي ووشهو الشي ؟ يعني شي شي
شي لو بشرح عنه شي ماني قادره
***
ياهلا ومية هلا يارحب ومية رحب
الرحب تنقل رحب والهلا تنقل هلا
لين تاصل غاية مناك يا اغلى من نحب
ان سلى قلبك من الحب ولا ماسلى
شوفتك عندي بساتين واطلال وسحب
ووحشتك يوم ابتعد عنك يادفع البلا
***
ليتني مثل النخل ما انتج الا تمر
لجل مايزعل فلان وفلان
اعرف ان الرزق مضمون والدنيا ممر
والاصدقاء ماذخرناهم الا لحاجات الزمان
احد لاجيت عنده راحت ثماني عشر
واحد لاجيت عنده راحت عشري ثمان
***
مابه جنابٍ دمث يحمد اربابه
كود الرجاجيل وكتوف الاراضيني
بعض الرجاجيل يطمع به ويلقا به
مهما اغتنوا عنه عادوا له فقاريني
مثل الجبل ينلقا به مطمع ذيابه
يركض به الذيب لين يعود حصيني
***
اصحاب طنّش تعش وايزي عادي شباب
يالعنبو من حسب منهم خليلٍ وفي
والله ان سبع الفواسق فوق وجه التراب
اطهر من سهومٍ لاتنطّح ولا تنقفي
اللب مايطبع الا في قلوب اللباب
وهزمة عدوٍ مبين ولا عدوٍ خفي
***
((ومن ماقاله في الابل ))
انا نياقي من مغاتير حثلان
اللي فعوله كل ابوها مغاتير
تشهد بها غيري طويلين الايمان
الأجواد بيضان الوجيه المسافير
مهما قعدت اجزا فعوله بعرفان
الفعل غير وحامدين الفعل غير
***
ماشرينا اللي طوالٍ لواحيها
غير من شان العفيشه وطياحه
لجل لاشافت جمالٍ يحاليها
تطمئن شوي وتحس بالراحه
كن وسعة خاطري يوم اراعيها
خالد الفيصل بتنشيط مفتاحه
***
واخيراً
ياللي تقولون ابن جدلان وينه
اخذو دليله واضحه للمناعير
عانوه نازلٍ في ظهرة الجنينه
بين النخل والعايدي والمغاتير
هذا مع الصبيان مكسب يمينه
ابرك من اللي شيبوا ما ارثوا خير[/center]
